日本就業番外篇：出國的心理準備

上次寫左幫日本人做野的煩野，有d讀者睇到有D灰。

其實我的目的唔係為左嚇大家，而係希望俾大家更全面的印象，冷靜d考慮一下。

如果我只係講好處，一味推你過黎，而唔話你知有咩要注意的話，我都覺得自己好賤，我做唔出。（咁當然，我認，我係順便發洩下lol。）

其實，人生同ＴＢＢ果Ｄ電視劇唔同。你細個睇《真情》，你發現呢個又話去法國發展，果個又話係越南做生意。講到去外國發展，好似去銅鑼灣食餐飯咁易。事實上，一個人到外國發展點都唔會係易事。有開心有唔開心。有滿意的有失望的。有接受到的有接受唔到的。我係大學，同自己朋友share house果陣，見過好多外國人嚮往日本而黎。有人成功搵到工作，做到佢地想做的事。有人帶住美好回憶回國，好想再返黎。有人咩都做唔到，渾渾噩噩咁搞到visa到期就回國。有人由愛變恨，頂唔順要回國，甚至有人因為咁患上抑鬱症。

要捱過負面的事，就要做好「覺悟」。

出左國唔好預左返香港

抱住唔掂就返香港的心態的人通常唔會堅持，一有野唔滿意就避，最後就真係渾渾噩噩咁返香港。

我係U記（賣衫果間呢）做PT時，試過2次俾日本阿伯歧視，一次話我點努力都做唔到「高尚的日本人」，叫我返「中國」，一次就俾人話「我唔同Chinese講野」。當時我真係好down，好想離開日本。但我知道我係日本的目標未達成，而家返香港就咩都完。而且無謂為左兩個已經失去人格同生活的阿伯放棄自己的生活。只要你生活得俾佢好，事實已證明一切。所以我最後堅持留返係度。除非你係為左玩而黎，否則冇「出走是為了回來」呢回事。（但為左玩的話你都唔會搵我地傾啦！）

仆街都唔好怨

一個人黎日本發展，一踏入日本國境一刻開始，你的人生的大半會被reset，你終於有自由去追求自己想要的，唔會有屋企人迫你（如果你屋企人迫你過黎的話，我諗你唔會咁認真搵到呢度），亦冇香港政府壓迫你。

但反過黎講，所有路都係你自己揀的，亦都無人幫你。之後所有野都係自己對自己的選擇負責。就算仆街都係自己做成，唔會再有對象俾你怨。錯左都係自己搵辦法補救。堅持定走另一條路亦係自己決定。當然唔係叫你唔好搵人幫，但要建立人際關係搵人幫都係自己去social，都係自己開口，而且最後執行的都係自己。人在外地所有野最後都係靠自己。擁有自由的同時，自己的屎自己食，與人無尤。

有「嘗試」精神

無論你睇過幾多書，有幾日本通，黎到日本，你都一定遇到好多你唔知道的事，有d會令你好shock，但同時呢d都係機會。難得黎到日本當然要冒險一下，咩都試下！黎到日本都係維持同香港一樣的生活方式的話咩都唔會變。周不時有人（外國人同日本人）問我點做好。有時我講到好白，教埋佢點做，但佢試都唔試就搵籍口話唔得，咁我都幫你唔到。係現實可能（當然唔係犯法）的情況下，試左先講，就算試左都係唔得，都係覺得唔啱自己都好，至少都知道原因，了解自己，到下一個機會黎的時候你都知道自己點做。

最少有一項你好鐘意的日本文化

黎日本前諗清楚自己鐘意日本文化邊一部分，具體係咩野。如果你只係有一個好模糊的生活image而黎日本，你想像的image一定會同現實唔同，而且一定會俾想像中差。（日本呢d先進國家通常會被人過度美化。）遇到呢個gap, 冇一個原因令你堅持的話你會好辛苦。呢個原因係咩都得，可以係夢想，可以係日本仔／妹，可以係j-pop，可以係idol，可以係アニメ……當你好down時，佢地可以救你一命！當然夢想的話會比較strong，人，idol等其他野的話就要睇你愛得有幾深，有幾專一啦lol 我就愛到搵到個日本妹啦！lol

我覺得如果香港滿足唔到你，不妨到外國闖一闖。有d野唔試過真係唔知結果。剛黎日本的我同而家的我真係成長左好多，自己都俾自己嚇親！呢個係我冇想像到的。我都好滿意自己係呢度學到的。就算而家叫我一定要返香港，我都無悔。

只想同大家講，要搏都要知道自己有幾多籌碼。了解自己的性格，知道自己的狀況，做好覺悟take自己的risk，對自己負責。如果唔係，係日本定香港都一樣，無謂花時間同錢過黎，又攪到自己唔開心。

大家如有career問題歡迎繼績隨便問（去Page度問都應該ＯＫ架啦，有咩事佢地會講返畀我知。我放左工就會睇返）！腦細、我＆其他同事會盡量答！

今後ともよろしくお願いします！m（＿＿）m

查看原始文章