【伸春行大運#1】我面前有道門這道門搭廉航往鹿兒島浸浴場

Holiday，我真係好愛你。

難得有假期，小廢青當然又返鄉下順便逃離腦細魔爪，而今次選擇去嘅就係未踏足過嘅土地－南鹿兒島。

伸春鹿兒島之旅首個落腳點就是指宿。
指宿對好多香港人嚟講，可能唔算係一個熱門景點。其實指宿距離鹿兒島中央只需要1個幾鐘車程，所以同真正嘅「市區」都唔會相隔太遠。
如果覺得山卡啦地方冇嘢好玩嘅就大錯特錯。當局深明發展旅遊業係當地今後一大課題，所以近年已經大力向外推廣指宿嘅魅力，尤其係積極各種可以畀遊客親身感受當地魅力嘅體驗活動，再加上出年首播嘅NHK大河劇都會喺到取景，因此我有理由相信指宿市喺嚟緊呢幾年會成為非常受外界注目嘅南九州地區之一！

回正題。
是咁的，小廢青降落鹿兒島機場再搭咗個幾鐘車之後，終於嚟到行程第一站嚟到「竹山」。

「竹山」呢個名可能聽上去平平無奇，但若果提到佢嘅別名－「スヌーピー山（Snoopy山）」嘅話，大家會唔會有返啲興趣？
「Snoopy山」顧名思義，就係一座外型非常近似Snoopy嘅山，只要離遠少少望再加少少想像力，座山就會好似一隻仰臥緊嘅Snoopy（好似係）。相傳呢個名仲係由著名高爾夫球選手Tiger Woods命名，但亦有人話只不過係當地人嘅約定俗成叫法，無論如何，都係一個暱稱啫。

先唔理個名點嚟，大家都係繼續睇景啦。

座落喺Snoopy山旁邊嘅，就係玉手箱溫泉。連續3年獲TripAdvisor選為日歸溫泉全國第1位嘅玉手箱溫泉，當然唔係一般溫泉貨色。呢度最煞食嘅就係遊客可以一邊浸溫泉一邊欣賞一望無邊無際嘅碧海汪洋！！！溫泉同大海連成一線，令人差啲仲以為自己處身茫茫大海！如果係日落時分嚟就更加冇得輸，無遮無擋嘅景觀下，一人獨享夕陽美景機會是屬於你的。但朝早或中午時分嚟都已經好靚。

玉手箱溫泉
網址：http://www.seika-spc.co.jp/healthy/?page_id=337

▲行遠少少可以影到「煙燻Snoopy」
如果想一邊浸溫泉一邊J Snoopy嘅話，玉手箱溫泉會係非常適合你嘅選擇。
但如果想用相機收服全隻Snoopy的話，就需要去到遠少少嘅地方喇。
（除咗似Snoopy之外，亦有一說係話山頭同猩猩都有幾分相似，但我睇咗好耐都睇唔出，sor。）

▲「煙燻Snoopy」攝於前往下一站中途會經過嘅「山川製鹽工場跡」旁，即舊時用溫泉熱出產海鹽嘅鹽田舊址。

浸完玉手箱溫泉唔夠喉嘅話，仲可以去埋隔離嘅「砂むし温泉砂湯里」。

距離玉手箱溫泉只係5分鐘路程嘅「砂むし温泉（砂蒸溫泉）」係全國少有嘅溫泉種類，唔係處處都可以體驗得到。
呢度最出名最有特色嘅就係「砂浴」，被譽為世界十大奇泉之一嘅砂浴，係用攝氏大約55度嘅高溫熱砂鋪滿你全身，等你由上至下瞬間血氣運行，只需10~15分鐘就可以達至美顏美肌、紓緩全身疲勞嘅效果。
砂浴位置啱啱好就係大海隔離，難得嚟到指宿，就當然唔好錯過「冰（迎面海風）、火（熱砂）」雙重享受。